بين القهر والقانون… حكاية بيت ناقص"
أطفالي ما بيعرفوا شو يعني قوانين ولا قرارات…
بس بيعرفوا إنو أبوهم غايب،
وبيعرفوا إنه يومًا ما رح يرجع،
وإنه في وجع ساكن بالبيت من يوم ما انأسر.
القهر مش بس بغيابه…
القهر بكل تفصيلة تركها وراه:
لما نسمع صوت أي مفتاح، بنتذكر صوت مفاتيحه وهو راجع من شغله…
ضحكته اللي كانت تسبق كل إشي، حتى لو موجوع ومقهور، كان يحاول ما يوصلنا شعوره…
وصوته اللي كان يطمن أطفاله: "أنا هون"… وصار ذكرى.
كل يوم بنرجّع ذكرياتنا غصب عنا،
بنحكي عنه كأنه بينا،
بنضحك شوي… وبننكسَر أكتر.
الصغير صار يحكي مع صورته،
والكبير صار يخاف ينسى صوته،
وأنا… خايفة عليهم من شعور الفقد قبل ما يصير حقيقة.
المعاناة مش بس بالبعد،
المعاناة بخوف يومي عم يكبر في قلوبهم:
إنه الغياب يطول…
وإنه الذكريات تصير كل اللي ضل.
ومن هون… أنا ما بقدر أسكت.
أنا معترضة، مش بس كأم، بل كإنسانة،
على كل قانون بزيد القهر قهر،
وعلى كل قرار بيحوّل الأسر من غياب مؤلم… لعذاب مضاعف.
قانون الإعدام مش رقم على ورق،
هو حكم بالرعب على قلوب أطفال،
هو سلب للأمل الأخير اللي عايشين عليه.
والأسر بحد ذاته مش بس حرمان من الحرية،
هو وجع ممتد لعيلة كاملة…
الأسير مش رقم،
الأسير ابن لأهله، وزوج لزوجته، وأب لأطفاله، وصديق لأصدقائه،وعامل في شغله
المهندس الطبيب الاستاذ الدكتور الممرض الصيدلي العامل وغيرهم من فئات المجتمع كلهم قيادتهم الأصفاد 😥
كل واحد منهم
إله أماكنه الشاغرة اللي ما بيملاها حد غيره.
أطفالي وجعهم كبير…
وأنا وجعي أكبر على وجعهم ووجع والدهم،
أنا بعيش كل سنة من عمري بعشرة.
بيتي انهدم وصار ذكرى…
بس ردمه، وحجارته، وريحة رطوبة حجارته،
كلها بتذكرني بكل شي حلو عشته فيه…
وكل لحظة حلوة عشتها، صارت وجع.
حتى الفرح… صار ناقص.
أولادي ما بيكفّوا أسئلة:
"ماما… بابا رح يرجع؟"
سؤال بسيط… بس جوابه بحجم وطن موجوع.
أنا هون مش بس بحكي عن عيلتي،
أنا بحكي عن آلاف الأطفال
اللي كبروا على الشوق، وعلى الخوف، وعلى الانتظار.
أطفالي ما بدهم شي كبير…
بس بدهم أبوهم يرجع،
بدهم حضنه، صوته، أمانه،
بدهم حياة ما فيها هالقهر كله.
فهل يُعقل إنو طفل يعيش كل هاد…
باسم قانون؟
ابني بيحكيلي:
"صح انتي بتحكيلنا إنو الحياة تشاركية، والتربية تقع على عاتق الأب والأم معًا…
طيب انتي ليش بتربينا لحالك؟ كيف زابطة معك الأمور؟"
أجبته:
هاي يا ماما قوانين التربية والنفسية في كل العالم…
ما عدا غزة،
لأنه غزة ما بيتربى فيها حدا إلا عالقهر والوجع.
يرجع يحكيلي:
"مش بابا كان يشتغل ويصرف علينا؟
من وين انتي هلا بتصرفي علينا وتطعمينا؟"
أجبته:
ما بعرف… رزقكم في السماء وماتوعدون.
ولسه كتير…
كل شوية سؤال ما إله جواب.
الجواب الوحيد على كل أسئلة أطفالنا هو…
واااااحسرتااااااااه على زمن لا يشبه أي زمن.
جزء من معاناة مشاعري وفقدي لكينونتي
بقلمي أكتب… فاطمة حرارة 🌸

تعليقات