عيدي مابين الأسير والمكلوم 🥺



 العيد عند أهالي الأسرى مش زي أي عيد


إنتو يمكن تستقبلوا العيد بالفرحة والتجهيزات واللمة،

وإحنا بنستقبله بقلوب تعبانة من الانتظار.


إنتو بتفكروا شو ناقصكم للعيد،

وإحنا ناقصنا ناس…

ناس كانت هي العيد كله.

اطفالي المظلومين المكلومين المشتاقين لأبوهم 

ولا زوجي اللي الله عالم بحاله شو وضعه

ولا قهري عليهم 

ايامي وعيدي بين الاسير والمكلومين الناس  بتصحى عتكبيرات العيد والضحك وصوت الناس،

واحنا بنصحى عالغصّة نفسها كل سنة،

على صورة أسيرنا معلقة عالحيط 

مستنيين معجزة ترجع الغايب.


إحنا أهالي الأسرى مش بس محرومين من وجودهم،

إحنا محرومين من شعور كامل كان يعيش جوانا.

شعور الأمان،

والراحة،

والفرحة اللي كانت تيجي بدون خوف وبدون وجع.


أنا كان نفسي بيتي يضل موجود…

أعزله للعيد، وأرتبه، وأحط أحلى شراشف، وأضل ألف فيه وأنا مبسوطة من ريحته وشكله.

كان نفسي أعمل كعك العيد اللي كل اللي حواليّ يستنوه،

وأنزل أجيب لأولادي لبس يفرحوا فيه،

وأرجع عالبيت تعبانة بس قلبي مليان فرحة.


كان نفسي أعيش شعور طبيعي جدًا…

الشعور اللي يمكن ناس كثير بتشوفه عادي،

بس بالنسبة إلنا صار حلم بعيد.


كان نفسي صباح العيد يكون خفيف عالقلب،

مش مليان غصص وصور وحنين وغياب.

كان نفسي اللي بحبني يكون أول واحد يعيد عليّ،

يمسك إيدي ونروح نصلي العيد سوا،

وأحس للحظة إنو الدنيا لسا بخير.


بس الاحتلال ما أخد منا أشخاص وبس…

هو أخد تفاصيل حياتنا كلها.

أخد اللمة،

وأخد الأمان،

وأخد الشعور الحلو اللي كنا نعيش عليه.


صار العيد يمرّ علينا وإحنا بنحاول نمثل إننا بخير،

عشان ولادنا،

وعشان أهلنا،

وعشان ما ننكسر أكثر.


في كل بيت أسير في حكاية وجع محدش شايفها.

في أم بتخبّي دمعتها،

وزوجة بتحاول تكون قوية وهي من جوا منهارة،

وأطفال كبروا وهم يعرفوا الغياب أكثر من الفرح.


ومع كل هالقهر…

إحنا راضيين بالله.

راضيين لأنو ما إلنا غيره،

ولأنو عارفين إنو ربنا شايف هالقلب قديش تعب،

وشايف كمية الصبر اللي عايشين فيها كل يوم.


إحنا مش معترضين عقدر ربنا،

بس موجوعين…

ومش أي وجع،

وجع عمره طويل وساكن بالروح.


وفي عز هالقهر،

لسا بنقول:

الله أكبر.


الله أكبر من السجن،

وأكبر من الغياب،

وأكبر من القهر اللي حاول يقتل الفرحة جوانا.


ويمكن الناس تشوفنا ساكتين،

بس محدش بيعرف قديش الدعوات طالعة من قلوبنا كل ليلة.

محدش بيعرف قديش نتمنى فرحة وحدة حقيقية تنسينا كل هالسنين.


يا رب فرحة تبكي عيوننا من كثر ما هي كبيرة،

يا رب عوض يداوي هالقلوب اللي تعبت،

يا رب تجمع كل غايب بأهله،

وترد لكل بيت روحه وفرحته.


لأنو والله…

إحنا تعبنا من الانتظار،

بس ما تعبنا من الأمل بالله.

نكتب لنحفظ الذاكرة من النسيان 🌸 

بقلمي اكتب 🌸فاطمة حرارة 🌸

تعليقات

المشاركات الشائعة من هذه المدونة

الفقد اللا متناهي 💔

فقد الأهل وأسر الحبيب 💔

الفقد المبكر 💔