العمر المسروق 🫂
دائمًا لما نحكي عن الأسير، منعدّ وجعه كأنه بس جسد محبوس، ومننسى إنه ورا هالجسد في قلب لسه عايش، بس عايش برا حقه بالحياة. بنحكي عن الزنزانة، عن القيد، عن القمع، عن الوقت اللي واقف، بس قليل ما نحكي عن الشي اللي ما بينشاف: قلبه اللي تُرك لحاله، ومشاعره اللي صارت تمشي بالفراغ، وعاطفته اللي انسرقت منه كأنه انسرق منه النور من آخر شباك صغير. الأسير مش بس بينعاقب، هو بينسحب منه كل شي كان رابط قلبه بالحياة برا الجدران. الباب اللي بيتسكر عليه مش بس باب زنزانة، هو باب بيتسكر وراه الحب، والاشتياق، وحقه الطبيعي إنه يحب ويِنحب ويطمن. في أشياء ما بتنكتب بملفات الأسر، ولا بتنعد بالأرقام. كيف بدك تقيس وجع إنسان شايف عمره عم يفلت من بين إيديه وهو واقف ما بيقدر يلحقه؟ وكيف بدك تقيس قلب مجبر يحب من بعيد، ويعيش على الذكرى بدل الحضور، ويخبّي اشتياقه جواته كأنه ذنب؟ كيف بدك تقيس سنين كلها صارت نسخة عن بعض، انتظار فوق انتظار، وصبر ما إله نهاية؟ الأسير ما بخاف من الوحدة قد ما بخاف يصير يتعوّد عليها. يصير الغياب عادي. يتعلم قلبه يشتاق بصمت، ويعيش الحب كأنه حلم مؤجل ما بيجي. تمر عليه أيام كان لازم يفرح فيها، بس ...